عاوز ابنك يكون واثق من نفسه ؟؟

قريت فكرة الموضوع ده وبجد عجبني جداا ودمه خفيف
اكيد كلنا نتمني ان ولادنا يكونو واثقين من نفسهم كده وجامدين
الثقه بالنفس صفه مش بيتميز بيها كتير من الناس بالرغم من اهميتها... اكيد طبعا الثقه مش هتيجي في يوم وليله وعشان ترجع الثقه لــــ واحد مهزوز شوية هيحتاج جهد كبير قوي

عشان تبني الثقه في اولادك .... خليك معايا بس
يلا نشوفهم مع بعض ..



- اول حاجه لازم تقعد مع ابنك علي الاقل مرة في الاسبوع علي انفراد .. ممكن مثلا تتغدو برا او تتمشي معاه تخرج معاه يعني ولو عندك اكتر من ابن بقي (ربنا يخليهم ليك) حاول تحسس كل واحد بينك وبينه كده انك بتقدره من غير تدخل اخواته .. عشان متلاقيش انهم بتنافسو عشان ياخدو اللقب وكده يبقي هتلاقي ديما واحد مكبر ومنطوي وانت مش واخد بالك ..

-شجعهم ديما وقدر مجهوداتهم حتي لو كانت بسيطه .. خليهم ديما يحسو انهم عملو حاجه كبيرة وشجعهم انهم يكملو ..
- في فكرة كده .. ايه رأيك كل يوم تعمل حفله ؟؟ لا متفهمش غلط .. مش حفله قوي يعني (مش هتكلف كتير) انا عارفه هتقول .. حفله ايه بس هو انا فاضيلهم انا نعساااااااااااان وعاوز اناااااام
اللي اقصده حفله صغيرة كده تحتفل فيها بإنجازات اليوم زي مثلا ابنك فقد سنته انهارده او اشترك في فريق كرة القدم او جاب درجه كويسه في الامتحان ..
ومش مشكله ممكن تعمل حفله مصاصات هات لكل واحد مصاصة
هيحسو كده انك مهتم بتفاصيل حيايتهم .. هيحبو ديما انهم يحكو ليك علي اي حاجه بس طبعا متعملش كده مع واحد وواحد لا مش عاوزين حقد بقي بينهم والكلام الفاضي ده ..

-خليك مهتم بيهم اكتر زي مثلا تدور في الحاجات القديمه بتعتهم وتحكيلهم قصص عن الفترة دي .. هتبقي حاجات مش فاكرينها وهيحبو قوي يسمعو حاجه زي كده ..
- حاول تدور علي حاجه اتعلمتها منهم وتفكرهم بيها.. دي هتزود الثقه جدااا عندهم
- طبعا يختارو اللبس اللي هما عاوزين وفي حاجه كمان حلوة قوي اندمج معاهم في اللعب جامد زي مثلا بيرسمو ووسخو نفسهم بالالوان اعمل زيهم بالظبط
وخد الرسومات دي وعلقها في مكان في البيت بتفتخر بيهم يعني
العب معاهم علي اد ما تقدر... يعني انا بحب قوي لعبه التمثيل في حاجات كده بتتباع بتتلبس في الايد مش فاكرة اسمها ايه هي شخصيات كده وبتمثل بيها ناوية اجيب منها يعني
( او اعملها انا ) هتبقي حاجه حلوة قوي زي اللي في الصورة اللي تحت دي ..




- لازم تكون عارف جدول اولادك ومدرسينهم واصحابهم ..عشان لما تسألهم تقلهم فلان عمل ايه معاك ...كده يعني مش عملت ايه انهارده؟؟ كده في اهتمام زياده
- لما ابنك يكلمك اديله كل تركيزك مش كل واحد في وادي زي مثلا الام بتتكلم وهي بتتطبخ او بتتفرج علي التلفزيون .... وبص في عينه وانت بتكلمه هيفرق كتير
- حاجه كمان ... مش بس تسمع منهم حاول تحكليهم حاجات حصلت معاك وتاخد رأيهم ديما
- في حاجه بقي بجد عجبتني جدااا ... لما تخرج او تسافر ممكن تكتب كلمه حب او تشجيع او نكته وحطها جنبه وهو نايم او في الشنطه من غير ما يعرف يعني هيحس انك بتفكر فيه ديما حتي وانت مش معاه ..
- لو عمل حاجه غلط ممكن بدل ما تقله انت عملت ده غلط وتخليه يفقد الثقه في نفسه قله مثلا الحاجه الفلانيه الصح انها تتعمل كده بلاش يعني الكلام المباشر ده ..
في حاجه ظريفة كمان ديما الاصحاب كده بيبقي بينهم كلمه او اشارة محدش بيعرفها غيرهم ممكن تعمل حاجه زي كده مع ابنك هيحس بالتواصل ديما معاك ...اكيد في حاجات كتير جداا وافكار كتيرة لو فكرنا ..


اخر حاجه احضن ابنك واديله بوسه كل يوم علي الماشي كده وقله انك بتحبه.. .. كل يوم ..
محتاجين ديما منك كده دون اعتبار لسنهم....

مواقف مضحكة :D

كيف كانت معاملة النبي للأطفال ؟؟

كيف كانت معاملة النبي صلى الله عليه وسلم للأطفال...؟؟

- $$ احترام وتقدير ذات الطفل $$



وهذه من أهم الأمور التي يحتاج إليها الطفل دائماً، ويغفل عنها الآباء غالباً. فقد كان النبي – صلى الله عليه وسلم- يُشعر الناشئة بمكانتهم وتقدير ذاتهم، فيروي عن أبو سعيد الخدري –رضي الله عنه– أن سعد بن مالك – رضي الله عنه – ممن استُصغِر يوم أحد، يقول -رضي الله عنه- إن الرسول – صلى الله عليه وسلم- نظر إليه، وقال: سعد بن مالك؟ قال: نعم بأبي أنت وأمي. قال: فدنوت منه فقبّلت ركبته، فقال : "آجرك الله في أبيك"، وكان قد قتل يومئذٍ شهيداً. فقد عامله الرسول – صلى الله عليه وسلم- وعزّاه تعزية الكبار، وواساه في مصيبته بعد ميدان المعركة مباشرة.
فما أحوجنا جميعاً إلى احترام عقول الأطفال، وعدم تسفيهها، وتقدير ذاتهم واحترام مشاعرهم، وهذا يجعل الطفل ينمو نمواً عقلياً واجتماعياً سليماً إن شاء الله.

- $$ تعويد الطفل على تحمل المسؤولية $$



وهذه ضرورة لا بد من تعويد الأطفال عليها، ونحن في أوقات فرضت الاتكالية والاعتمادية نفسها على الكبار والصغار سواء بسواء، فالمربي الواعي يساعد الناشئ على تنمية مفهوم إيجابي عن نفسه، يعينه مستقبلاً على تحمل المسؤولية. فقد اهتم الرسول – صلى الله عليه وسلم- في بناء شخصية الناشئين من حوله، روى مسلم عن سعد الساعدي – رضي الله عنه- أن رسول الله – صلى الله عليه وسلم- أتى بشراب فشرب منه، وعن يمينه غلام وعن يساره شيوخ، فقال للغلام: "أتأذن لي أن أعطي هؤلاء"؟ فقال الغلام: لا والله لا أوثر بنصيبي منك أحداً".
وهكذا يعتاد الطفل على الجرأة الأدبية، فينشأ وفيه قوة رأي ورجاحة عقل، بعيداً عن روح الانهزامية والسلبية، وهذا يتنافى مع الحياء الذي فرضه الإسلام.

- $$ حاجة الطفل إلى الإحساس بالعدل في التربية $$



وذلك من أهم عوامل الاستقرار النفسي، فلا يلهب الآباء الغيرة بين الأبناء، ولا يثيرون التنافس فيما بينهم بتفضيل بعضهم على بعض، وقد تكون من وجهة نظر الآباء يسيرة وبسيطة كالقبلة أو الابتسامة أو الاهتمام الزائد بتلبية حاجة واحد على الآخر، وتلبية رغباته في المأكل أو المشرب أو الملبس.
فعن النعمان بن بشير أن أمه -بنت رواحة- سألت أباه بعض الموهبة من ماله لابنها، فالتوى بها سنة ثم بدا له فقالت: لا أرضى حتى تُشهد رسول الله – صلى الله عليه وسلم- على ما وهبت لابني، فأخذ أبي بيدي وأنا يومئذ غلام. فأتى رسول الله- صلى الله عليه وسلم- فقال: يا رسول الله إن أم هذا (بنت رواحة) أعجبها أن أشهدك على الذي وهبت لابنها، فقال رسول الله – صلى الله عليه وسلم- "يا بشير ألك ولد سوى هذا"؟ قال: نعم. فقال :" أكلهم وهبت له مثل هذا"؟ قال: لا . قال : " فلا تشهدني إذاً، فإني لا أشهد على جور" وفي رواية قال: " أيسرك أن يكونوا إليك في البر سواء"؟ قال : بلى. قال النبي – صلى الله عليه وسلم : "فلا إذاً" رواه مسلم.

- $$ حاجة الطفل للحنان والمرح $$



وهذه حاجة ضرورية للطفل وطبيعته ما دام ذلك في الحدود الشرعية، فلا يجب أن تسرف فيها* حتى لا يتعود الطفل على التدليل، ولا تقتر فيها* فيحرم الطفل من أهم حاجياته الطبيعية، فيكون معقداً أو يتولّد عنده الانطواء والخجل.
ومما رواه البخاري عن عائشة –رضي الله عنها- قالت: كنت ألعب بالبنات عند النبي – صلى الله عليه وسلم-، وكان لي صواحب يلعبن معي، فكان رسول الله – صلى الله عليه وسلم- إذا دخل يتقمَّعن منه، فيسرِّبهًن إليّ، فيلعبن معي.
وهكذا لا تحرم الناشئة من الحنان الطبيعي، والمرح الذي يجدد النشاط، على أن يكون ذلك متوازياً، يحفظ لهم شخصياتهم وتماسكهم الوجداني.

-$$ أنت أفضل معلم لطفلك $$



وليكن واقعك للتقدم هو مرضاة الله، وليس لأن يكون ابنك أفضل من فلان، وعوده دائماً على التشجيع، ولا تتوقع منه الكمال، واعلم أن كثرة الكلام –أحياناً- لا تؤتي أكلها، في حين تجد أن الموعظة الحسنة والقدوة الطيبة تؤتي أكلها كل حين بإذن ربها، وهذا ما أدركه الصحابة من فعل النبي –صلى الله عليه وسلم- فيروي أحد الصحابة أن وائل بن مسعود – رضي الله عنه – يذكرنا كل خميس مرة . فقال له رجل يا أبا عبد الرحمن لوددت أن ذكرتنا كل يوم. فقال: أما إنه يمنعني من ذلك أني أكره أن أمِلَّكم، وإني أتخوَّلكم بالموعظة كما كان رسول الله – صلى الله عليه وسلم- يتعهدنا بها مخافة السآمة علينا" متفق عليه.

وروي أنّ النبيّ صلّى الله عليه وآله كان يصلّي يوماً في فئة والحسين صغير بالقرب منه، فكان النبيّ صلّى الله عليه وآله إذا سجد جاء الحسين فركب ظهره ثم حرّك رجليه، وقال: حل حل، فإذا أراد رسول الله صلّى الله عليه وآله أن يرفع رأسه أخذه فوضعه إلى جانبه، فإذا سجد عاد على ظهره وقال: حل حل، فلم يزل يفعل ذلك حتى فرغ النبيّ صلّى الله عليه وآله من صلاته. فقال يهوديّ: يا محمد! إنّكم لتفعلون بالصبيان شيئاً ما نفعله نحن. فقال النبيّ صلّى الله عليه وآله أمّا لو كنتم تؤمنون بالله ورسوله، لرحمتم الصبيان. قال: فإنّي أؤمن بالله ورسوله. فأسلم لما رأى كرمه صلّى الله عليه وآله مع عظم قدره.

وذات يوم كان رسول الله صلّى الله عليه وآله يقبل الحسن والحسين عليهما السلام، فقال الأقرع بن حابس: إنّ لي عشرة، ما قبّلت واحداً منهم قطّ. فغضب رسول الله صلّى الله عليه وآله حتى التمع لونه، وقال للرجل: إن كان الله قد نزع الرحمة من قلبك فما أصنع بك؟! من لا يرحم صغيرنا ولا يعزّز كبيرنا فليس منّا

وروي أنّ النبيّ صلّى الله عليه وآله مّر على بيت فاطمة عليها السلام فسمع الحسين يبكي، فقال: ألم تعلمي أنّ بكاءه يؤذيني

"لما قريت الحته دي افتكرت والدي ... بابا ديما كان يقولنا مش عاوز اشوف حد بيعيط ويقعد يصالح فينا حتي لو احنا الغالطنين
وفي الغالب اكيد بنكون احنا الغلطانين ...... كان بيزعل قوي لما حد فينا يحصله حاجه ..يقع ..يتخبط او يتعب حاجه زي كده يعني .. وكان بيعمل حاجه بتخليني اكون مبسوطه من جوايا كده ... كان احيانا بيزعق ليا او لحد من اخواتي لما حد فينا يحصله حاجه من كتر الخضه علينا عشان ناخد بالنا بعد كده.. ومازال طبعا .... مع انها بتبقي حاجه غريبه شويه يعني انت المجني عليك وكمان بيتزعقلك "
ربنا يخليه لينا يارب وميحرمناش منه ابدا

نكمل بقي ...
وعن أبي هريرة:خرج رسول الله صلّى الله عليه وآله ومعه الحسن والحسين هذا على عاتقه، وهذا على عاتقه، وهو يلثم هذا مرّة وهذا مرّة حتى انتهى إلينا، فقال له رجل: يا رسول الله صلّى الله عليه وآله إنّك لتحبّهما؟ فقال: من أحبّهما فقد..أحبّني، ومن أبغضهما فقد أبغضني.


$$ وأخيراً أهديك هذه النصيحة $$



غضب معاوية – رضي الله عنه- على ابنه يزيد فهجره، فقال له الأحنف: يا أمير المؤمنين أولادنا ثمار قلوبنا، وعماد ظهورنا، ونحن لهم سماء ظليلة، وأرض ذليلة، فإن غضبوا فأرضهم، وإن سألوا فأعطهم، ولا تكن عليهم قفلاً* فيملوا حياتك ويتمنوا موتك.

هذا أيها الأحباب جزء من كل مما كان يفعله النبي – صلى الله عليه وسلم- مع الناشئة، فحري بنا أن نقتدي به – صلى الله عليه وسلم

جامدين ^_^

حدوتة قبل النوم

لا مش هتوصل للدرجه دي اني احكيلكو حدوته قبل النوم ..

كتير قوي منا مكنش بينام غير لما يسمع حدوته ..وكمان مش اي حد بيحكيها
وكنا بنحب قوي الحكيات دي زي الشاطر حسن ... ال3 اميرات..وغيرها حتي لو عارفين ايه النهايه
برضه بنبقي منتبهين وعاوزين نكمل الحكاية ...
اكيد هيجي عليك الدور انك انت / انتي اللي هتحكي الحدوته دي مع اخ اصغر منك
او ابنك .. يمكن زمان كانت بالنسبه ليك مجرد حاجه بتسليك وبتحبها .. كتير دلوقتي
مبقاش بيحكي حدوته قبل النوم لاسباب كتيرة .. مش فاضي .. تعبان ... مش شايف ليها اهمية ...الخ


بس هي ليها اهميه وتأثير كبير علي الطفل ..

هتشجعه علي حب القراءة .. الي حد ما هيكون عنده معرفه .. هتساعده انه يبدأ يسال
.. هتدربه علي مهارات الحديث والتواصل والانصات
هتعمله ازاي يكون الحوار وازاي يحترم رأي الاخر
وطبعا ليها تاثير كبير في خيال الطفل ومهاراته .. تنميته لغويا
وتساعده في الاعداد للقراءة... كمان ده بيعتبر من احسن الاوقات لحكاية قصة
زي ما قال دكتور وخبير التنمية البشرية ابراهيم الفقي ان الانسان يبني علي اخر تجربه
يعني لما الانسان ينام وهو مبسوط وبيحلم بمستقبل مشرق هيصحي نشيط ومتفائل وعنده رغبه
انه يغير حياته للاحسن نفس الكلام بالنسبه للطفل قبل النوم بيكون هدوء ده بيدي مجال لخيال الطفل
ان يعمل ويتخيل مما يساعد علي توسيع مداركه...
اهم من كل ده شعور الطفل بالامان والحب ..

ممكن مرة كده تخليه هو اللي يحكي حدوته تكون حكتهاله قبل كده
وشوف الطريقه اللي هيحكيها بيها ..
بالطريقه دي هتزود ثقته بنفسه .. يقول رأيه بجرأه



طيب نختار بقي الحكايه المناسبه لكل عمر

- الاطفال قبل المدرسه : حكاية صغيرة ابطالها حيوانات او اطفال .. كوميدية
-من 6-10 سنين : حكيات خرافيه.. ابطالها خارقين ومغامرات
وطبعا بما ان الحكايات دي بيكون ليها تأثير كبير في حياة الطفل ولها علاقه بتربيته
وتنشئته يبقي تكون تنشئه صحيحة ... ده بانك تحكيله سيرة رسولنا الكريم صلي الله عليه وسلم
سيرة امهات المؤنين والصحابه رضي الله عنهم...الابطال والقاده العظماء زي صلاح الدين
وسيف الدين قطز ونور الدين الزنكي وغيرهم ....

في شويه حجات كده ناخد بالنا منهم ...

-سرد القصه فن وسهل انك تتعلمه...يعني ممكن شويه مؤثرات صوتيه زي تغيير
نبرة الصوت مع كل شخصيه حركات الايد والتمثيل ... اهم من ده كله انك تخلي الطفل يتفاعل
مع القصة زي مثلا تسأله .. ده اذا هو مسألش يعني

- ولما الطفل يسأل سؤال وانت بتحكي يبقي تجاوب عليه ..ده بيدل علي انه متفاعل مع القصه
. وعنده عقل يعي ويدرك
- لازم تسأله ايه اللي اسستفاده من الحكايه في الاخر
- تحاول تستخدم اسلوب مشوق .. زي ايه مثلا؟؟
انك تسكت شويه كده وانت بتحكي ..تخليه يقولك كمل ...او قبل ما تقول النهاية
خليه يقول النهايه اللي متخيلها ..
- لو جاوب اجايه صح يبقي يستاهل التشجيع والمدح بس مش كتير عشان ميبقاش مغرور
- انك تخلي القصه حافز ليه عشان يجتهد في دروسه وواجباته
- من غير مبالغة

وفي الاخر بطلب منك تحكي لاخوك/ ابنك قصة

فساتين اطفال

العنف عند الاطفال

زي العادة ... اكيد بيعاني كتير من الآباء من السلوك ده
ممكن نقول عليه عدوانيه ... عدوانيه تجاه اطفال تانيه او حاجه بتعتهم او حتي مع نفسهم
وكالعادة ممكن الآباء ميعرفوش انهم السبب في السلوك ده !!
في شويه اسئله كده في الاول ...
- الاطفال بيجيبو السلوك العدواني ده منين؟؟
-طيب ازاي ممكن نحميهم من العدوانيه عشان متكنش صفه ملازمه ليهم ؟؟
- اذا كان عدواني فعلا ازاي اقدر اعالجه ؟؟
- ازاي نتعامل معاهم ؟؟
يعني في الاجابه علي الاسئلة دي ممكن نقلل من ظاهرة العنف عند الاطفال
اكيد عارفين ان الطفل لا يولد محبا للاذي او العداء لكن بيبقي كده
نتيجه لتجارب يصادفها في حياته .....مع والديه ...اخواته ..اصحابه .. معلميه
من الطبيعي جداا ان الطفل الاكبرسناً يقسو علي اخوه / اخته الرضيع ويبقي نفسه لو يرميه من الشباك ....
مش هيكون فاهم في السن ده ان الام ممكن تحب طفلين في نفس الوقت "غيرة " ...
لكن لما يفضل الشعور ده معاه لغاية 15 سنه ويبقي مفيش في دماغه غير التهديد والوعيد لا خته الاصغر منه ...
ده يبقي في كلام تاني ومن المعروف ان الطفل بيقلد الوالدين وبيخدو اللي الام والاب بيعملوه
نماذج للسلوك عشان كده لازم تكون قدوة حسنه عشان بعد كده متلومش نفسك ...
دي كانت مقدمة كده



ندخل بقي في الموضوع ...
في حد ميعرفش يعني ايه طفل يكون عدواني ؟؟
اوكي عارفين انا هقول برضه ...
العدوانيه هي اي فعل من غير اي مبرر وبيكون فيه ضرر للنفس او الناس او الممتلكات او البيئه .. الطبيعه
.. ممكن يكون لفظي او عملي ..
بطريقه تانيه اذا لقيت طفل بيستمتع لما يبين اخطاء غيره .. ويبقي مبسوط لما يؤذيهم ... بالضرب او شتيمه ....او يجرح مشاعرهم ف ده طفل عدواني ...فقد الحنان والاهتمام ..
ميقدرش ينفصل عن من حوله وفي نفس الوقت ميقدرش يكون علي اتصال معهم ....
علي الرغم من ان الطفل العدواني يزعج من حوله ..زي يضرب حد او يخطف لعبة حد واذا اتعاقب يزيد هياجه ...
فهو في النهايه طفل زي الاطفال الابرياء يبكي كثيرا بمفرده



امثلة للعنف عند الاطفال ...

- ايذاء جسدي عن عمد زي الضرب وعادة بيكون الطفل المعتدي عليه ضعيف لا يقدر علي المجابهه
- الاستهزاء
-التخويف
- التحقير من شأن طفل اخر
- رميه بالقاب معينه لها علاقه بشكله زي طوله او قصره او لها علاقه بالبلد التي ينتمي ليها
يعني ممكن احنا بنقول عليها رخامه
- تدمير ما يتصل بالمرفقات العامه والمنشآت

دول شويه امثله بسيطه كده مظاهر العنف بقي ....

ممكن تتخيل ان طفل يكون فيه كل الحجات دي
1- مظاهر العنف تجاه نفسه:
-رفض النصح والتوجيه
-تمزيق الملابس الشخصيه عند التشاجر مع الغير
- يقطع كتبه .. يشد شعره .. يضرب راسه في الحيطه
-ايذاء النفس بالضرب
-الامتهان الزائد للنفس
- تعريض النفس للخطر



2- مظاهر العنف مع الرفاق

-الاعتداء علي الرفاق بالضرب
- الاشتراكات في شلل وتهديد الرفاق " شر بقي "
- اخفاء واتلاف ممتلكات الرفاق " يا لئييييم "
-اثارة جو من العداء المستمر بين الرفاق " شوشو بقي هيشتغل "
- تعمد دفع الرفاق علي الارض " عنده صحه زياده شويه "

3- مظاهر العنف تجاه السلطه

- سب المدرسين او ما يمثل السلطه
-تعطيل المدرس عن الشرح
- التهكم والسخريه من المدرس

4-مظاهر العنف تجاه المدرسه

-اتلاف اساس المدرسه
-اتلاف ادوات النشاط المدرسي
-التمرد علي الواقع التعليمي
-احداث شغب بين الحصص المدرسيه " لا دي بقي كان لازم نطلع من الفصل نفضل
يعني طول اليوم في الفصل ده يبقي حرام حتي "
-تشويه الحوائط المدرسيه
- الهروب من المدرسه " بينطو من علي السور "



المهم بقي ..
بجد يعني لو مقرأتش البوست كله لازم تقرا الاسباب علي الاقل ....

من اسباب هذا السلوك ..
هل نحن السبب في عدوانيه اطفالنا ؟؟؟
في كتير من الاطفال يتصفون بالعنف ... بيتخنقو مع اخواتهم علطول ...
بيكسرو بعض اثاث البيت عند الغضب وفي نفس الوقت مش بيقدرو يسيطرو علي نفسهم ! هتلاحظ ان بعض الاطفال بيلجأو للعنف من وقت لاخر زي مثلا لما يكون عاوز حاجه واللي قدامه مش عاوز يدهاله
هتلاقيه بيصرخ او يضرب او يدفع اي انسان او اي حاجه واقفه في طريقه ..
وطبعا الولاد تتصرف بشكل عدواني اكتر من البنات لاسباب بيولوجية وبيئية
يعني غالبا الناس بتتوقع من الولد انه يكون عدائيا ومنافس في تصرفاته ومن البنت التسامح والتعاون
بجد تلاقي الطفل براءة كده في الاول هو ينزل الشارع من هنا يرجع واحد تاني وطبعا الكلام ده بيكون اكتر علي الولاد ..



ايه السبب بقي ؟؟
ناخدها كده من الاول خالص ...
رقم (1)
السلوك العدواني يبدأ من رحم الام :
كتير من الخبراء قالو ان السلوك العدواني بيدأ في ال 3 سنين الاولي ولكنه اتضح ان اساس العدوان
يمكن ان يبدأ اثناء الحمل يعني ايه ؟؟
في حجات بتأثر علي الطفل في المرحله دي بتهيئه لحاله السلوك العدواني الزائد بعد كده زي ايه مثلا ...
الاجهاد اللي بتتعرض ليه الام الحامل ....عادات التغذية ...تعرضها لسموم بيئية او تعاطيها المخدرات والكحول ..
او عصبيتها الزائده في المرحله دي هتلاقيكي بتتخنقي مثلا وهو جوه بيتخانق معاكي
الحجات دي بتاثر علي الطفل ... (تتلف الميكا نزمات العصبيه التي تسيطر علي مزاجه وضبطه لنفسه )
بتنعكس عليه بعد كده ...
يبقي خدي بالك بقي

انتو تعبتو ولا ايه ؟؟ لسه بدري



رقم (2)
العوامل الاسرية :
طبعا الاسرة هي المصدر الرئيسي في عملية التنشئة الاجتماعية ورعاية الطفل واشباع حاجاته الاساسيه من طعام وشراب
واشعاره بالامن ..... لكن بسبب الوضع الاسري السائد حاليا ممكن يكون سبب كمان زي ايه ؟
- طبعا دلوقتي معظم الامهات بتشتغل وبتسيب البيت فترة طويله من النهار ده بيتسبب في حرمان الطفل
من العطف والحنان
-حاجه تانيه ودي مهمه جدا الخلافات بين الام والاب ...
اكيد يعني الاطفال هيتأثرو بحاجه زي كده يعني زي ما انت بتعمل هما برضه هيعملو اذا كانت الخلافات
دي فيها عدوان لفظي او بدني " يا مفتري " ياريت بقي بلاش الكلام ده قدام الاطفال
-كمان عامل مهم قوي بيكون سبب هو هجرة الاب وتركهم
- لما يكون الاب تحت ضغط نفسي لاي مشكلة ما ده اكيد هياثر علي الاطفال
- المكان اللي عايش فيه الطفل مكان ضيق ميقدرش يلعب براحته .. كبت حريته بمعني اصح
-كمان زي ما قلت لما الطفل ينزل الشارع و الوقت الاكبر يكون هناك
- لما يكون الام والاب مش عارفين ازاي يربو ولادهم ...
جهلهم بأساليب التنشئة الاجتماعيه السليمه
واخد بالك
يعني ممكن قرايتك دي تفيدك بعد كده ... ماشي يلا نكمل

- عدد الاطفال الكبير " ديما تلاقي كله بيقول هو كفايه 2 بنت وولد وبعد كده تلاقي حاجه تانيه "
-واكيد سبب كبير قوي في عنف الطفل هو عنفك انت معاه والطريقه الغلط اللي بتربيه بيها
واولها الضرب "لاااااا للضرب "
- سوء المعاملة نفسيا زي ديما كده بتحسسه انه مالوش لازمه او انه غير محبوب او غير مرغوب فيه
او شتايم بقي واهانته ادام الناس
اه بجد انا شفت كتير من النوع ده ما يحلالهمش تهزيق ابنه الا ادام الناس ... بجد حرام عليهم
- المعاملة التمييزية بين الاطفال
- في حاجه كمان
دي بقي بجد بتحصل كتير قوي وتقريبا محدش مستوعب انها غلط لما اب يكافئ الطفل اللي بيستخدم العنف
زي مثلا يقله انت راجل خد حقك بإيدك..
او لما تساعده بعد ما يعمل عملته انه يهرب من الطفل اللي اضرب
وطبعا الدلع الزياده وهو صغير هيخليه يتعود ديما اي حاجه هو عاوزها وهو كبير لازم تكون عنده وده بياثر عليه بالسلب بعد كده لما حاجه زي كده متتحققش او لما اب يقول لابنه اخوك احسن منك ...
انت كده هتخليه يكره اخوه
يا مسهل ...
رقم (3)
العوامل المدرسية :
من اسباب سلوك العنف عند الاطفال اللي بيكون السبب فيها المدرس نفسه ...
-اولها غياب القدوة الحسنه غالبا
-عدم الاهتمام بمشاكل التلميذ
-غياب الارشاد والتوجيه من قبل المدرس
- ضعف الثقه في المدرس
- تلاقي المدرس علطول يلوم في التلميذ " لغايه ما يعمله عقدة في الاخر "
- ضعف شخصيه بعض المدرسين " تلاقي الواد بقي بلطجي مع المدرس "

من اسباب سلوك العنف عند الاطفال اللي بيكون السبب فيها مجتمع المدرسة عموما ....
-ضعف اللوائح المدرسيه
-عدم كفايه الانشطه المدرسيه "تلاقيهم في حصة الالعاب مثلا يقعدو ينضفو الحوش يعني حتي الانشطه المتاحه
او موجوده بالفعل مش متحققه
-زيادة كثافة الفصول الدراسية
- مفيش عدل في معاملة الطفل في المدرسه
- مفيش اهتمام خالص بتوزيع الطلاب علي الفصول حسب سلوكياتهم تلاقي
الفصل الواحد في اكتر من طفل مشاكس
- طبعا ما يتعرض له الطفل من فشل دراسي ده هيسبب احباط هيسبب غضب الطفل يؤدي
الي ظهور بعض من العدوانيه



رقم (4)
وسائل الاعلام :
- اول حاجه العاب الاتاري والفيديو والكمبيوتر طبيعي جدا لما الطفل يلعب لعبه في الكمبيوتر بتعتمد علي العنف ...
هيزيد جواه الافكار العدوانية واكيد طبعا اللعبه دي هتكون اكتر ضرر علي الطفل من انه يتفرج علي كرتون
فيه بعض العنف عشان بيكون في تفاعل بينها وبين الطفل والطفل بيتقمص الدور عشان يلعبه .....
بعد فترة كده هتلاقي الطفل بيفكر تفكير عدواني وكل ما تزيد المدة اللي بيمارس فيها الطفل الالعاب دي هتكون تاثيرها في اعمق ...



- تاني حاجه التلفزيون اكيد كلنا واحنا صغيرين كنا بنتفرج علي توم وجيري او حتي منا لسه بيتفرج عليه لغايه دلوقتي
طيب احنا حاليا واحنا بنفرج كده اهي مجرد حاجه دمها خفيف ممكن نضحك عليها وكمان محبوبه لكن مفكرتش قبل كده ان حتي توم وجيري فيها عنف لما مثلا جيري يضرب توم علي راسه بمكواه كبيرة ...
ممكن تتخيل ان ممكن طفل يعمل كده مع اخوه ويحسبها لعبه مهو توم قام تاني ومحصلوش حاجه بقي يعني عادي ممكن نقيس علي الاساس ده كتير من برامج الاطفال ...



غالبا معظم الناس مش بتهتم .... وكتير قوي في برامج الاطفال الشرير مش بيتعاقب ده يخلي الاطفال
يفهمو انه شكل من اشكال البطوله ..... وانه حاجه غير مؤذيه ...
مثال علي كده ان الطفل من 3 سنين بيكون عاوز مسدس يلعب بيه وفعلا بيجيبه وبيضرب علي اخواته وبيكون فرحان بكده ..
من غير توجيه من الوالدين وده بيفسر سبب انتشار الجرائم بعد كده .....
رقم (5)
الملونات والاضافات الغذائيه:
لغايه دلوقتي تفريبا كلنا بناكل شبسي وكراتيه و........ وفي ناس وصلت معاهم لدرجه الادمان ..... بالفعل تسبب ازدياد السلوك العدواني للطفل وتقلبات مزاجية
وتغيرات سلوكية حادة



يلا بقي قرأت لغايه هنا كمل للاخر بقي
من صفات الطفل العدواني .....

يجد صعوبه في ايجاد صداقات في المدرسه بيكون صعب عليه انه يتعامل مع الناس
ممكن يكون بيلجا للعدوان لما يحس بالظلم او عدم ثقته بنفسه او يكذب ليبرر عدوانه
بعد ما قرأت كل ده ... ازاي بقي تتعامل مع الطفل العدواني ؟؟

قبل ما اقول ازاي نتعامل هقول الطرق الغلط اللي بيعمله بعض الناس
- في ناس بتسجيب للعدوان ده بالعدوان طبعا كده الموضوع هيكبر اكتر وهيكون سلوك اساسي في شخصية الطفل
- ومنهم من يتجنب الطفل ويبعد اطفاله عنهم حتي لا يقلدوه وممكن يبعدو عن الاسرة كلها
- ناس تانيه بقي زي ما بيقولو تكبير دماغ يدوله كل اللي هو عاوزه تجنبا للمشاكل وطبعا كل ده غلط


طيب ايه هي بقي الوسائل المناسبه علي الاقل لتقليل العدوانيه دي ؟؟

- لازم يحس ان سلوكه ده غير مقبول من الجميع - بلاش ضرب وزعيق وفي نفس الوقت من غير تساهل معاه
- تحاول تعرف ايه السبب في عدوانه وتحلها - عدم اعطاء الطفل العدواني اي مكافأه ..
ده عشان ميفتكرش انه كده بيعمل حاجه صح
وعشان محدش من اخواته يقلده لازم يكون في عقاب بعيد عن العقاب الجسدي عشان كده بتزود جواه احاسيس العنف
- يعني ممكن يكون الطفل اللي عنده ميول عدوانيه ديما من افضل الاطفال اللي ممكن نستغل الطاقه
اللي عندهم في حاجه مفيده ليهم زي الرياضه ... يبقي من طفل عدواني ... لبطل رياضي ....
- لازم تدي للطفل فرصه انه يتكلم ويعبر عن نفسه وعن رايه ... ولما يمتنع عن العنف طبعا يكون ليه مكفأه ... يبقي لازم التشجيع ديما

كيفية وقايه الطفل من سلوكيات العنف ؟؟
- توفير الحب والحنان واخد ثقته من بدايه العمر
-لا زم تكون جنبه ديما وانك مستعد انك تتكلم معاه في اي مشكله
- تعرف مين صحايه ومين الناس اللي بيتكلم معاهم وايه الاماكن اللي بيروحها وتوجيه ونصحه عند اي مشكله
" بلاش تكبير الدماغ مش هيلاقي حد غيرك ممكن يعمل معاه كده "
-محاوله الظهور كمثل اعلي يحتذي به وعدم اظهار المشاكل والخلافات العائلية
- تعد معاه كده وتاخد رايه في العقاب اللي هيكون عليه لو اخطأ وعدم التهاون في تطبيق العقاب اذا اخطا - طبعا مش عارفه دي المرة الكام اللي بقول فيها بلاش الضرب طيب ممكن تعمل ايه بدل الضرب يعني
تنفذ معاه عقاب مؤقت زي ايه مثلا ... منعه من الخروج مع صحابه ..
حرمانه من المصروف يعني ممكن يتعلم كده ان العنف مش هو الحل ...
-مشاركه الطفل الافلام والبرامج اللي بيتفرج عليها بما فيها الكرتون بس دي صعبه شويه عشان اكيد
مش هيكون في وقت يعني علي اد ما تقدر او علي الاقل تسأله كل يوم في اخر اليوم هو عمل
ايه طول اليوم او اتفرج علي ايه خلي ديما يكون في متابعه ...
او بطرقتك بقي تخليه هو اللي يجي يحكيلك كل يوم عمل ايه من غير ما تطلب منه
- تعلمه ان عمر ما العنف كان الرد عليه بالعنف بل الهدوء والصرامه في الموقف والكلام المهذب ..
وان الشجاعه في السيطرة علي النفس مش انك ترد عليه بالعنف
- تساعده علي التعرف علي العنف وعلي عواقبه ايه الناتج من كده عشان يكون عارف الصح من الغلط ويقدر
يحدد اللي بيعمله ده صح او غلط
- تعليم الطفل كيف يتقي الخطر والعنف وازاي يطلبو المساعده
-عدم المبالغه في اخافه الاطفال عند حدوث خطر



دول بقي شويه مواقف كده وايه المفروض تعمله فيها .......
الموقف : طفل يسحب اللعبه من طفل اخر
البديل : عرض الطريقه المثلي لطلب اللعبه بدل من سحبها
الموقف : راي طفل صغير شجار بين بالغين
البديل :اخبار الطفل انه ليس من واجبه حل هذا الشجار بل عليه ان يحمي نفسه ويغادر الغرفه او المكان بسرعه
الموقف : دفع طفل اخر بقوة فسقط علي الارض واجهش بالبكاء
البديل : احتضان الطفل الضحيه ومحاولة تهدئته ثم اوضح للمعتدي خطأه واطلب منه الاعتذار للضحية
يعني وهكذا بقي ...........
في الاول كده انا عارفه اني مقصرة في المدونه دي عشان كده كتبت البوست الصغير جدا ده
يارب يعجبكم وتستفيدو منه
انا كنت هقسمه علي مرتين بس عادي اللي مش هيقدر يقراه كله مرة واحده ممكن يقرا علي اكتر من مرة بس في ناس بتحب انها لما تقرا موضوع تكمله كله مرة واحده يعني...
يلا عقبال ما تقرو يكون عدي اسبوعين تاني
وان شاء الله هيكون في بوست مفيد المرة الجايه