لا مش هتوصل للدرجه دي اني احكيلكو حدوته قبل النوم ..
كتير قوي منا مكنش بينام غير لما يسمع حدوته ..وكمان مش اي حد بيحكيها
وكنا بنحب قوي الحكيات دي زي الشاطر حسن ... ال3 اميرات..وغيرها حتي لو عارفين ايه النهايه
برضه بنبقي منتبهين وعاوزين نكمل الحكاية ...
اكيد هيجي عليك الدور انك انت / انتي اللي هتحكي الحدوته دي مع اخ اصغر منك
او ابنك .. يمكن زمان كانت بالنسبه ليك مجرد حاجه بتسليك وبتحبها .. كتير دلوقتي
مبقاش بيحكي حدوته قبل النوم لاسباب كتيرة .. مش فاضي .. تعبان ... مش شايف ليها اهمية ..
بس هي ليها اهميه وتأثير كبير علي الطفل ..
هتشجعه علي حب القراءة .. الي حد ما هيكون عنده معرفه .. هتساعده انه يبدأ يسال
.. هتدربه علي مهارات الحديث والتواصل والانصات
هتعمله ازاي يكون الحوار وازاي يحترم رأي الاخر
وطبعا ليها تاثير كبير في خيال الطفل ومهاراته .. تنميته لغويا
وتساعده في الاعداد للقراءة... كمان ده بيعتبر من احسن الاوقات لحكاية قصة
زي ما قال دكتور وخبير التنمية البشرية ابراهيم الفقي ان الانسان يبني علي اخر تجربه
يعني لما الانسان ينام وهو مبسوط وبيحلم بمستقبل مشرق هيصحي نشيط ومتفائل وعنده رغبه
انه يغير حياته للاحسن نفس الكلام بالنسبه للطفل قبل النوم بيكون هدوء ده بيدي مجال لخيال الطفل
ان يعمل ويتخيل مما يساعد علي توسيع مداركه...
اهم من كل ده شعور الطفل بالامان والحب ..
ممكن مرة كده تخليه هو اللي يحكي حدوته تكون حكتهاله قبل كده
وشوف الطريقه اللي هيحكيها بيها ..
بالطريقه دي هتزود ثقته بنفسه .. يقول رأيه بجرأه
طيب نختار بقي الحكايه المناسبه لكل عمر
- الاطفال قبل المدرسه : حكاية صغيرة ابطالها حيوانات او اطفال .. كوميدية
-من 6-10 سنين : حكيات خرافيه.. ابطالها خارقين ومغامرات
وطبعا بما ان الحكايات دي بيكون ليها تأثير كبير في حياة الطفل ولها علاقه بتربيته
وتنشئته يبقي تكون تنشئه صحيحة ... ده بانك تحكيله سيرة رسولنا الكريم صلي الله عليه وسلم
سيرة امهات المؤنين والصحابه رضي الله عنهم...الابطال والقاده العظماء زي صلاح الدين
وسيف الدين قطز ونور الدين الزنكي وغيرهم ....
في شويه حجات كده ناخد بالنا منهم ...
-سرد القصه فن وسهل انك تتعلمه...يعني ممكن شويه مؤثرات صوتيه زي تغيير
نبرة الصوت مع كل شخصيه حركات الايد والتمثيل ... اهم من ده كله انك تخلي الطفل يتفاعل
مع القصة زي مثلا تسأله .. ده اذا هو مسألش يعني
- ولما الطفل يسأل سؤال وانت بتحكي يبقي تجاوب عليه ..ده بيدل علي انه متفاعل مع القصه
. وعنده عقل يعي ويدرك
- لازم تسأله ايه اللي اسستفاده من الحكايه في الاخر
- تحاول تستخدم اسلوب مشوق .. زي ايه مثلا؟؟
انك تسكت شويه كده وانت بتحكي ..تخليه يقولك كمل ...او قبل ما تقول النهاية
خليه يقول النهايه اللي متخيلها ..
- لو جاوب اجايه صح يبقي يستاهل التشجيع والمدح بس مش كتير عشان ميبقاش مغرور
- انك تخلي القصه حافز ليه عشان يجتهد في دروسه وواجباته
- من غير مبالغة
وفي الاخر بطلب منك تحكي لاخوك/ ابنك قصة
سلام عليكم......ازيك يازهره ....حلو الموضوع بجد ومهم اوي انا مقتنع بحكايه انك تقري لاطفال بس طبعا مش القصص الهابطه اللي عندنا زي حكايه القرد اللي سرق الموزه لما الاطفال بتطلع زي القرود...يعني احسن حاجه تشتري كتاب فيه صور وتقري منه وتوريله الصور زي اللي في الصوره كده مش تفضل تخترع في حكايات الهدف منها ان يزهق وينام انا سمعت ان في بريطانيا اي طفل بيتولد بيتبعتله شنطه فيها كتب طبعا بتبقي كتب لمراحل مختلفه علشان يقدر يفكر ويستوعب بدل شغل القرود اللي عندنا ده وقنوات الاطفال مهمه كمان علشان جو اكرتون والموثرات والاهم من ده كله سيره الرسول عليه افضل الصلاه والسلام والصحابه علشان يطلع ليه قدوه بدل الحاجات اللي ملهاش لازمه ا...حاضر علشان خاطرك هاحكيله قصه
ردحذفوعليكم السلام ورحمة الله وبركاته
ردحذفالحمدالله تمام..
حلوة قصص هابطه دي...ليه دي حتي بتعلمهم يكون ليهم هدف :D
اكيد الصور بيكون ليها تأثير اكبر في الذاكرة.. بس علي فكرة مفيش اطفال بتزهق من القصص ..وحلوة فكرة الشنطه دي بس الكلام ده مينفعش عندنا في مصر هما هياخدو الكتب بس هيعملو بيها حاجه تاني :D
شكرا علي المتابعه :)
سلام عليكم
حلو البوست دا اوى .. انا على فكرة من مدمنى حكاوى قبل النوم .. بجد :D
ردحذفولسه لحد دلوقتى لو بابا جه نام جنبى اتحايل عليه يحكيلى حدوتة بس فى الاغلب مبيرضاش :D
بس فعلا حواديت قبل النوم مؤثرة جدا فى نفسية الطفل .. انا عن نفسى اتأثرت بيها بغباء
وكانت سبب رئيسى انى دلوقتى بموت فى حاجة اسمها قراية .. بس الاهم من انه تعلم الطفل القراية انها بتعلمه ازاى يتخيل ويبقى حر فى تفكيره مش مقيد بالحاجات اللى بيشوفها بس
بتفيده بعد كده انه يبقى شخص مبدع وعنده افكار كتير
مشكلتها بس ان الاطفال احيانا كتير بيتمسكوا بالقصص الخيالية ولو حاولتى تحكى اى حاجة مفيدة ليها هدف واضح .. هتلاقيكى بتقوليها لازم تقوليها بأسلوب مشوق بزيادة عشان يتشدلها
السلام عليكم
ردحذفازيك يا زهره
علي الرغم ان المواضيع مش كتيره بس بجد تحفه اوووووي
كنت بقري في البوست وعمال اقوول هي نسيت تكتب ان الطفل بيحس باالامان والحب
بس غلبتيني المره دي
واعتقد دي اكبر فايده من موضوع القصص
ممكن الاهل يفتكروا ان موضوع القصص ده شيئ عبيط او مجرد حاجات عاديه
بس هو فعلا مش كده خالص لان الطفل اكتر حد بيحتاج اهتمام ويا سلام بقي لو حسستيه انه حد مهم ولازم يتحكي ليه حكايه ,,,
بس انا في وجهه نظري ان اللي يحكي الحدوته الاب مش عارف ليه ؟بجد مش عارف انا مقتنع بكده ليه؟
ممكن عشان حنان الام هو اللي ديما ظاهر؟
وان لازم حنان الاب برده يبان شويه؟
ولا ممكن عشان الطفل بيحب يحس بالاحتضان من حد قوي
مش قصدي قوه الجسم علي فكره :D
الحاجه التانيه ان لازم نعرف احنا بنحكي ايه مش حكاياتن عبيطه والسلام
لازم تكون حاجه ليها مؤثر مفيد زي القصص الدينيه
وممكن برده خياليه بس يكون وراها فايده
معلش عارف اني طولت اووووووووووووووووي
تسلم ايديكي
خلاص اجي انام جنبك واحكيلك حدوته ولا يهمك....بس ماليش دعوة بقي بالاحلام اللي هتحلميها :D
ردحذف//
مشكلتها بس ان الاطفال احيانا كتير بيتمسكوا بالقصص الخيالية ولو حاولتى تحكى اى حاجة مفيدة ليها هدف واضح .. هتلاقيكى بتقوليها لازم تقوليها بأسلوب مشوق بزيادة عشان يتشدلها
//
اه عندك حق ..
نورتي المدونه يا سمسم (k)
zikooooo :
ردحذفوعليكم السلام ورحمة الله وبركاته
الحمدالله ..
ربنا يكرمك :)
اه فعلا هي دي ممكن تكون اكتر حاجه تأثر في نفسية الطفل.
//
بس انا في وجهه نظري ان اللي يحكي الحدوته الاب مش عارف ليه ؟بجد مش عارف انا مقتنع بكده ليه؟
ممكن عشان حنان الام هو اللي ديما ظاهر؟
وان لازم حنان الاب برده يبان شويه؟
ولا ممكن عشان الطفل بيحب يحس بالاحتضان من حد قوي
مش قصدي قوه الجسم علي فكره :D
//
مش عارفه ! بس اكيد هيكون احسن لما يكون الام والاب
مفيش مشكله ... اهو حتي الام تستريح شوية :D
يمكن بيكون علي حسب كل طفل واللي اتعود عليه ... لما بيكبر بقي بيكون مقتنع بحاجه معينه يعني واخد علي مين اللي يحكي يعني ...
شكرا للزيارة :)